హృదయం
  ఎక్కువ కులాలవాళ్ళం అనుకునేవాళ్లు తక్కువకులాల వాళ్ళకంటే ఏ మాత్రం తక్కువవాళ్ళు కాదు అనేది నా జీవితం.
  మతాలలోని మానవత్వం ఏకైక మార్గంలో సాగాలని నా అభిమతం.
  మతైక్యం సాధించే లక్ష్యంలో మతాంతర వివాహాలు జరగాలనేది నా ఆశయం.
  భవిష్యత్తులో ప్రవర్తిల్లే ప్రపంచంలో ఏ విధంగానూ తేడాలు ఉండకూడదని నా ఆశ.
  క్రీస్తు రక్తతేజంలో సందేశమూ, గాంధీ రుధిరచ్ఛాయల్లో ధర్మమూ, బుద్ధుని నెత్తుటి చారలు జాడల విద్యుత్తులో అహింసా సమతకు నవ్యనాందీ అని నా హృదయం.
  విశ్వం, దైవం, మానవత్వం, మానవజీవితం అంతా ఒక్కటేనని నా కాంక్ష.
  జీవనంలో, చేతనంలో, జిగీషలో,జీవికలో మమతలతో, మధురిమలతో, మనస్సులతో, మధువులతో మానవుడు మహోత్తముడు అనేది నా నమ్మకం.
  ఓం! జీవితం శ్రీకారం. దేవుడు పరిపూర్ణుడు. సృష్టి చిరంజీవి. ఏ పేరూ, ఏ రూపూలేని దైవమా! సర్వసౌఖ్యాలూ కలిగించే మతసమన్వయం సృష్టించు. మానవతా హృదయదీపిక వెలిగించు. మానవజాతి ప్రగతికీ పురోగతికీ భవిష్యత్తు బాట చూపించు, ఆమెన్‌- ఇది నా ప్రార్థన.
  కవి మనస్సూ, ఋషి తపస్సూ, దేవుడి తేజస్సూ, సూర్యుడి ఉషస్సూ ఏకత్వం బోధించే కాంతిపుంజాలు. ఇది నా భావన.
  సృష్టి, బాధ, హృదయం, కవిత్వం, స్వర్గం, నరకం, జననం, మరణం, సమతను బోధించే పతాకలు - నా నిర్ణయం.
  ద్వంద్వాలు విభిన్నాలు కావు. భూమధ్యరేఖకు రెండు అంచులు. భూగోళానికే రెండు ధ్రువాలు. మానవత్వానికి రెండు దిక్కులు. స్త్రీ పురుషులు ద్వంద్వాతీతులు - నా సమన్వయం.
  మానవ మనస్తత్వంలో మార్పురావాలి. మానవుడు మహామానవుడూ, మాధవుడూ కావాలి - నా కోర్కె.
  కష్టం, నష్టం, సుఖం, భాగ్యం వెంట నీడలులా వుంటాయి. అహింసను హింస వెంటాడుతూ వుంటుంది. చీకటి పగలు రెండు సంధ్యలు - నా అనుభవం.
  కాలం అనంతం. సృష్టి అనంతం. ధర్మం అనంతం. మానవత్వం అనంతం - నా నిరీక్ష.
  సమాధి గుండెలో నవ్వువుంది.
  సౌరభం వెదజల్లే గులాబిపువ్వు పుట్టుక ముళ్ళవిూద జరిగింది.
  దేవుడి ప్రేమలో దెయ్యం జీవితం సంపాదించుకుంటుంది.
  అంతం లేని ఆకాశం అంచుల కౌగిలిలో అవధి దాటిపోతుంది.
  ప్రకృతి సౌందర్యంలో పాప ఏడ్పులో, పసివాడి వలపులో దైవత్వం నృత్యం చేస్తుంది.
  ప్రాణం పోయే తాత అనుభవంలో, సముద్రం ఘోషలో, అగ్నిజ్వాల అందంలో, చీమనవ్విన సవ్వడిలో, అనంతంలో మిళితమయ్యే ఆరిపోయిన దీపకళికలో,పెళ్ళి తోరణంలో, శవశరీరంవిూది అత్తరు సువాసనలో, పెరుగుతున్న మొక్కలో, విరుగుతున్న కొమ్మలో జగత్తు రహస్యం లీలగా దోబూచులాడుతూ కదులుతుంది.
  ఇది నా కవిత్వం.
  నా నవలపేరు సమత.
  సమత నా సాహిత్యం. నా సర్వస్వం.
  నాలోని చైతన్య సంకల్ప సర్వానికీ రాజారావు కొంతవరకు భంగ్యంతరంగా సంకేతం. చంద్రునికొక నూలుపోగు.
  సమత నవలలో రాజారావు పాత్ర ఒక కల్పన.
  నవ్యత్వ కవిత్వం నా తత్త్వం.
  నాయకుడు మామూలు యువకుడు!
  సమత నవనీతం.
  నా ధ్యేయం వర్ధిల్లుతుంది. నా లక్ష్యం పునీతమవుతుంది.
  నేను భారతీయుడ్ని. ప్రపంచ పౌరుడ్ని, నాకు మానవత్వం విూద విశ్వాసం ఉంది.
  మనీషి జయశీలి.
  జనత జయిస్తుంది.

   
   -కొలకలూరి
  చిత్తూరు
  సెప్టెంబరు 1961